ومضات حوار بين ( الام وابنها الشهيد)

الام
ييمه أشلون رحت أو وين ضليت
اجو كل اصدقائك ونته ما جيت
اتانيـك أبغيابك كارهـــه البيت
وبسمك حيل اصيح أبصـوت مجنون

الابن
ييمه ارجوچ فدوه أوكافي الدموع
ولا تبچين يمه أبصوت مسموع
يمه اعله الگبر شعليلي لشموع
ولا أتهلين يمه أدموع العيون

الام
ربيتك ييمه وصارلي أسنين
اتاني أبيوم اشوفك تملي العين
وأحني أبيوم عرسك كل الايدين



جبتلك حنه يمه أتعوفني أشلون

الابن
ييمه الحنه ثـوبيهه الشبابي
عـذريني يمه ارجـوچ مجبور أبغيابي
اعوفچ يمه ما چان أبحسابي
بس الـزمن قاسي أوبچه الجفون


الام
ييمه انته حياتي وعمري وعضاي
عفتني أشلون بيه أتشمت اعداي
اون عليك اضلن طول دنياي
وخلي أعيوني من النوح يدمون

الابن
دمعاتچ ييمه افديها بالروح
تركتچ گلبي يمه اعليچ مجـروح
وحس أعيوني تبچي أو دمعتي أتنوح
وكثر دمعاتي يمه أتفيض الكـون


الام
گلبي بغيبتك يمه نشـــدني
ياهو الغسلك يوليــدي يبني
غم الموت يمه الخــذك مني
وودعك يمه گمت ويه اليودعون

الابن
الله وياچ يمه أمسافر ابعيـد
ولا تنسيني يمه لـو يجي العيد
تعاليلي ارد اشوفچ ضايج أوحيد
وباوع عالـدرب بلكت تمرون

الام
تباوع عالدرب بلكت نمر ليش
انه بليـاك يمه بعد ما عيش
بعدك عاصفه وروحي صفت ريش
وشفت روحك تعزي أويه اليعزون